牧函20－『我阿爸』

 

"我阿爸"

（冇膽作家牧函020-20241129）

每個月，我都會約我阿爸食餐飯，阿爸每次見我，都會喺屋企執一大袋用品俾我，有家庭用品、有音響器材、有手機和耳機配件、有CD、有上個世紀嘅古董、有我小時候嘅珍貴相片和甚麼證書。

醫院覆診

最近半年，阿爸消瘦了很多，瘦咗十幾公斤，面頰凹了，我同細妹到擔心。

尋日陪阿爸見醫生睇報告，證實血糖正常，亦暫沒有其他指數異常，初步估計老爸牙齒脫落，影響食量，身體消瘦。

老爸忘記了覆診，兩科預約放飛機，尋日我請醫生幫忙寫求情信，再去兩科部門交信申請延期覆診。

老爸尋日血壓超高，感恩成功得到醫院補藥，直至一月內科覆診見醫生。

每個月，我都會約我阿爸食餐飯，佢每次都會同佢去屋企樓下茶餐廳，食碟豆腐火腩飯，老爸已經快樂到由心滿足。

尋日同佢到醫院覆診，之後同佢飲茶食飯，佢就與街坊茶客搭枱又搭嗲：

『依個我大仔！我啲仔女好乖！我好感恩！係上帝俾我嘅恩典！』

作為小小傳道嘅我，掛住食飯，並冇開口講見證；

我阿爸，就開口見證上帝，因著，佢真係覺得感恩，就與人分享、就開口見證。